वीरगंज । पर्साका सक्रिय पत्रकार हरिशंकर शर्मालाई फसाउने गम्भीर षड्यन्त्र भएको आशङ्का गरिएको छ । ज्यान मार्ने कसुरमा १० वर्ष र हातहतियार मुद्दामा ३ वर्ष जेल सजाय भोगेर छुटेका व्यक्ति अपहरणमा परेको घटना र यसमा प्रहरी तथा पत्रकारलाई एकैसाथ संलग्न गराउने प्रयासले यस प्रकरणलाई थप रहस्यमय बनाएको छ ।
अपहरणमा परेको भनिएका व्यक्ति प्रहरीलाई भेट्न जिल्ला प्रहरी कार्यालय पुगेको र पैसा लिएर ‘सम्झौता गरिदिन’ पत्रकारसँग अनुरोध गरेको विवरणले घटनाको पृष्ठभूमि आर्थिक लेनदेनसँग जोडिएको हुनसक्ने सङ्केत गरेको छ । यस्तै, अपहरण भएको स्थान भनिएको रक्सौलबाट ती व्यक्ति वीरगञ्जको बसपार्कसम्म आएर पत्रकारलाई भेट्नु, उनी पत्रकारसँगै पक्राउ परेका इनर्वाका सन्तोष दासबिचको सम्बन्ध, र अपहरणमा परेको भनिएका शेख भोलासँग सन्तोषको पुरानो मित्रताको तथ्यले पनि घटनालाई गम्भीर बनाएको छ ।
जानकारीअनुसार, जेलमा रहेका बेला चौकीदार रहेका शेख भोला र सन्तोष दासबिच मित्रता स्थापित भएको थियो । भोलाले प्रहरीसमक्ष दिएको बयानमा सन्तोषको समूहले उनीबाट चेक, मोटरसाइकल, बिलबुक, लाइसेन्स र नागरिकताको प्रतिलिपि लिएको बताएका छन् । तर, हरिशंकर शर्मा कुनै पनि बेला त्यहाँ उपस्थित नभएको बताइएको छ ।
पत्रकार पक्राउ परेपछि तस्करीका नाइकेहरू जिल्ला प्रहरी कार्यालयमा पुगेर दबाब सिर्जना गर्न खोज्नु, प्रहरीले अपहरणको घटनामा ५० हजार रकम बरामद गरे पनि यसको वास्तविकता अझै प्रस्ट नहुनुले घटनालाई तोडमोड गर्ने प्रयास भएको हुनसक्ने शङ्का गरिएको छ ।
घटनाको केही दिनअघि हरिशंकर शर्माले जेलमा रहेका कैदीहरू राति एक विवाह समारोहमा नाचगान गरिरहेको भिडियो भेटेका थिए । उक्त भिडियो हेर्दै शर्माले जिल्ला कारागारका जेलर र एसपीलाई कल गरे तर फोन नउठेपछि प्रमुख जिल्ला अधिकारी (सिडिओ)लाई सम्पर्क गरेर घटनाको जानकारी गराएका थिए । सिडिओले ‘म बुझ्छु’ भनेपछि शर्माले भिडियो सिडिओलाई पठाएका थिए ।
भिडियो सिडिओले प्राप्त गरे लगत्तै कारागारमा छानबिन गर्न निर्देशन दिए । घटनापछि कारबाहीबाट जोगिन जेलका डनहरूले प्रहरी र तस्करहरूसँग मिलेर पत्रकारलाई फसाउने योजना बनाएको स्रोतले दाबी गरेको छ ।
हरिशंकर शर्मालाई पक्राउ गरेको २४ घण्टा बितिसक्दा पनि पर्साका प्रमुख जिल्ला अधिकारीलाई प्रहरीले बिफ्रिङ नगर्नुले प्रशासन र प्रहरीको भूमिकाप्रति प्रश्न उठाएको छ । सिडिओ अर्यालले ‘केही समयअघि मात्रै प्रहरीबाट ब्रिफिङ पाएको’ बताएका थिए । यसबारे पत्रकार महासङ्घले पर्साका प्रहरी अधिकारीहरूसँग बुझ्न खोज्दा भेट्नसमेत अस्वीकार गर्नुले शङ्का थपिएको छ ।
पत्रकार शर्मामाथि पेशेवर अपराधीसरह व्यवहार गर्नु, परिवारलाई भेट्न रोक लगाइनु, र प्रहरीले अनुसन्धान प्रक्रियामा पर्याप्त पारदर्शिता नदेखाउनुले यस घटनाले गहिरो षड्यन्त्रको सङ्केत गरेको छ । अदालतले शर्मालाई अनुसन्धानका लागि ७ दिनको म्याद दिएको छ ।